ՀՅԴ Արեւմտեան Ամերիկայի Կենտրոնական Կոմիտէից տեղեկանում ենք որ շրջանը նախապատրաստւում է Հայ Յեղափոխական Դաշնակցութեան 34րդ Ընդհանուր Ժողովի համար:
Դաշնակցութեան բարձրագոյն ժողովը իւրաքանչիւր չորս տարին մէկ անգամ քննում է բազմաբնոյթ հարցեր և շօշափում է ոչ միայն կուսակցական այլ նաև բոլոր այն հարցերը, որոնք անմիջականօրէն ազդում են հայութեան եւ Հայաստանի ճակատագրին:
ՀՅԴ ընդհանուր ժողովները միաժամանակ այն բացառիկ առիթներն են իւրաքանչիւր դաշնակցականի համար, որտեղ նա իր տեսակէտներն է փոխանցում դաշնակցութեան գերագոյն ժողովին և մասնակից է դառնում համակուսակցական և համահայկական հիմնահարցերի ձևաւորման և դրանց լուծումների գործընթացին: Մի իրաւունք, որ իւրաքանչիւր դաշնակցականի համար վերապահուած է իր կանոնագրով: Բնականաբար սոյն իրաւունքին զուգահեռ իւրաքանչիւր դաշնակցական ստանձնում է որոշակի պարտաւորութիւններ, որոնք ոչ միայն աւելի քան 131 տարիների ընթացքում դարձել են մեր կուսակցութեան բարոյական նկարագրի անբաժանելի մասնիկը, այլ նաև յստակօրէն բանաձևուած են ՀՅԴ կանոնագրի մէջ:
Յառաջիկայ ընդհանուր ժողովը ոչ միայն քննարկելու է Հայաստանի ու հայութեան համար ներկայի ճգնաժամային իրավիճակը և իր քաղաքական ուղեգիծն է որոշելու յառաջիկայ բախտորոշ չորս տարիների համար, այլ նաև քննարկելու է ՀՅԴ կառոյցի և կազմակերպական կանոնների վերանայման հարցը:
ՀՅԴ Արևմտեան Ամերիկայի կազմակերպութիւնը հաւատարիմ իր 131 ամեայ աւանդին ու բարոյական արժէքներին և իբրև անբաժան մասնիկը Հայ Յեղափոխական Դաշնակցութեան համաշխարհային ընտանիքի իր ամբողջական մասնակցութիւնն է բերելու այս կարևոր համագումարին: Միաժամանակ տեղեկացանք, որ Կենտրոնական Կոմիտէն առանձին գրութեամբ շրջանիս բոլոր ընկերներին կոչ է ուղղել , որպէսզի գործօն մասնակցութիւն ցուցաբերեն իրենց պատկան ժողովներին և օգտագործելով իրենց կանոնագրական իրաւունքը, այս բախտորոշ օրերին իրենց ներդրումն ունենան կազմակերպութեան և հայրենիքի ապագայի գործընթացներին:
